O‘zLiDePning “Farovon oila” hamda “Salomtalik sari” loyihalari doirasida Ohangaron tuman tibbiyot birlashmasida navbatdagi tadbir tashkil etildi.
O‘zLiDeP Siyosiy Kengashi Ijroiya qo‘mitasi raisi o‘rinbosari Gulshana Xudoyorova trenerligida o‘tgan seminar-treningda asosiy e’tibor ayollarning huquq va manfaatlarini himoya qilish, xotin-qizlarni ijtimoiy hayotga faol jalb etish, ayniqsa, ajrim yoqasida turgan ayollarni qo‘llab-quvvatlash masalasiga alohida e’tibor qaratildi.
Xususan, xotin-qizlarning huquqiy bilimlarni mustahkamlash, huquqbuzarlikka moyilligi bor ayollar bilan yakka tartibda ish olib borish, jazoni ijro etish muassasalaridan ozod qilingan xotin-qizlarning ijtimoiy reabilitatsiyasi va jamiyatga moslashishi uchun shart-sharoit yaratish bo‘yicha taklif-tavsiyalar tinglandi.
Shuningdek, ularni oilaviy tadbirkorlik va hunarmandchilikka yo‘naltirish bo‘yicha partiyaviy loyihalarga keng jalb etishga kelishib olindi.
Seminar-treningda xotin-qizlar o‘zlarini qiziqtirgan savollarga javob olishdi.