O‘zbekiston Respublikasi Prezidentining 2025-yil 24-noyabrda qabul qilingan “Toshkent shahrida ekologik vaziyatni yaxshilash bo‘yicha kechiktirib bo‘lmaydigan chora-tadbirlar to‘g‘risida”gi Farmoni mamlakatimiz poytaxtidagi ekologik vaziyatni yaxshilashga qaratilgan dolzarb va ayni vaqtida qabul qilingan hujjat hisoblanadi.

O‘zbekiston Liberal-demokratik partiyasi ushbu farmonni amalga oshirishda faol ishtirok etadi.

Partiya barcha darajadagi deputatlar, faollar va tuzilmalar orqali farmonda belgilab berilgan vazifalarning bajarilishida quyidagi yo‘nalishlarda o‘zi uchun aniq va dolzarb vazifalarni belgilab oldi.

I. Tashkiliy chora-tadbirlar:

a) farmonda belgilangan masalalar ijrosi bo‘yicha, shuningdek tabiatni asrash va fuqarolarning qulay atrof muhitga ega bo‘lish huquqini kafolatlash maqsadida parlament va mahalliy Kengashlarda qat’iy deputatlik nazorati o‘rnatamiz;

b) atmosfera havosiga ifloslantiruvchi moddalar chiqarilishi va qonunchilik talablariga rioya etishi ustidan jamoatchilik nazoratini o‘rnatish maqsadida barcha darajadagi deputatlar hamda tabiatimizga befarq bo‘lmagan faol fuqarolardan iborat Jamoatchilik nazorat guruhlari tuzildi hamda ularning samarali faoliyat olib borishini ta’minlaymiz;

v) Toshkent shahridagi ekologik vaziyat, havo sifati, qurilish ishlari va yashil hududlarning holati bo‘yicha joylarda doimiy jamoatchilik monitoringini o‘tkazish hamda aholini ekologik harakatlarga keng jalb etamiz;

g) poytaxtda yashil maydonlarni ko‘paytirish, atmosfera havosini yaxshilash hamda ekologik madaniyatni oshirishga qaratilgan partiyaviy loyihalarni amalga oshiramiz.

II. Tashabbuslar:

a) barcha hududlarda, avvalo Toshkent shahrida atmosfera havosini yaxshilash bo‘yicha “Musaffo havo – 2030 milliy dasturi”ni ishlab chiqilishi bo‘yicha choralar ko‘ramiz;

b) atmosfera havosini yaxshilash bo‘yicha xorijiy davlat tajribasidan kelib chiqib, poytaxtimizda atmosfera xavosini yaxshilash va tozalashga qaratilgan Smog Filtering Towers kabi yirik inshootlarni o‘rnatish masalasini Maxsus komissiya bilan birgalikda ishlab chiqamiz;

v) biznes yuritishda ekologik etika masalalariga to‘la rioya qilishni o‘z shioriga aylantirgan tadbirkorlar harakatini qo‘llab-quvvatlaymiz, ularning saflari kengayib borishini ta’minlashga qaratilgan keng ko‘lamli ishlarini amalga oshiramiz;

g) tadbirkorlar orasida ekolik ma’suliyatli faoliyatni ommalashtirish va rag‘batlantirishga qaratilgan yangi partiyaviy loyiha – “Ekologik mas’uliyatli tadbirkor” loyihasini ishga tushiramiz va ekologik mas’uliyatli tadbirkorlarni rag‘batlantirib boramiz;

d) tadbirkorlar tomonidan atrof-muhitni muhofaza qilish qoidalariga rioya qilish, chiqindilarni tashlashni kamaytirish hamda ishlab chiqarish jarayonlarida ekologik toza energiyaga o‘tishni jadallashtirishga qaratilgan Biznesga ekologik yordam dasturini hamkor tashkilotlar bilan birgalikda amalga oshiramiz;

e) ekologik toza transportlar uchun zarur infratuzilmani rivojlantirish, elektr transport vositalarini ommalashtirish bo‘yicha qo‘shimcha imtiyozlar qonunni qabul qilish zarur. Bu borada fraksiya bilan ishlarni boshlaymiz;

j) ko‘mir, mazut kabi atrof-muhitga kuchli zarar yetkazayotgan energiya manbalarini o‘rniga bosqichma-bosqich ekologik toza geotermal va boshqa qayta tiklanuvchi energiya turlarini keng yo‘lga qo‘yish bo‘yicha tashabbuslarni ilgari suramiz.

O‘zLiDeP mamlakatimizda ekologiyani yaxshilash, aholining hayot sifatini oshirish va sog‘lom muhit yaratishni ustuvor yo‘nalish deb biladi. Partiya barcha fuqarolar, jamoat tashkilotlari va mas’ul idoralarni ushbu muhim jarayonda birlashishga chaqiradi.

O‘zLiDeP – toza havo, sog‘lom muhit va yashil kelajak uchun!

 O‘zbekiston Liberal-demokratik partiyasi
Axborot xizmati