Yangi o‘quv yili arafasida O‘zLiDeP Jizzax viloyat Kengashi tashabbusi bilan “Tadbirkorlardan bolajonlarga” xayriya aksiyasi tashkil etildi. Aksiya doirasida Baxmal tumanidagi “Do‘stlik” mahallasida yashovchi ijtimoiy himoyaga muhtoj 8 ta oilaning farzandlariga yangi maktab formalari va o‘quv qurollari to‘plamlari topshirildi.

Ezgu tashabbus oilalarning yangi o‘quv yiliga tayyorgarligida amaliy ko‘mak bo‘ldi. Ayniqsa, ikki nafar farzandi uchun maktab anjomlarini tayyorlashda qiynalayotgan Dilafruz Eshonqulova kabi ota-onalar uchun bu yordam katta quvonch bag‘ishladi. E’tiborli jihati, aksiyada ishtirok etgan tadbirkorlar o‘z nomlarini oshkor qilmaslikni so‘rab, saxovatni chin dildan va beg‘araz amalga oshirishni afzal ko‘rishdi.

Bunday xayrli ishlar inson qadri, mehr-oqibat va ijtimoiy mas’uliyat kabi ezgu qadriyatlarni yanada mustahkamlaydi. Yaxshilik va saxovat ko‘paygan sari jamiyatimizda mehr va hamjihatlik muhiti ham yanada mustahkamlanadi.