Urgut tumanida xalq vakillari, yoshlar hamda biznes vakillari ishtirokida bir qator muhim uchrashuvlar o‘tkazilib, tumanning rivojlanish istiqbollari, yoshlar uchun imkoniyatlar va sanoat salohiyati atroflicha muhokama qilindi.

O'zLiDeP fraksiyasi a'zolari Zebiniso Raxmanova, Muhsinjon Xolmuxammedov, Diyor Xusanov hamda tuman Kengashi deputati Go‘zal Hamroqulova Samarqand davlat universitetining Urgut filialida yoshlar bilan ochiq muloqot uyushtirdi. Uchrashuvda yoshlar siyosati, ta’lim sohasidagi islohotlar, innovasion g‘oyalarni qo‘llab-quvvatlash, korrupsiyaga qarshi kurashish kabi muhim masalalar muhokama qilindi.
Deputatlar ta’lim sifatini oshirish, zamonaviy laboratoriyalar, grant va stipendiyalar imkoniyatlari, shaffof baholash tizimi joriy etilayotgani haqida ma’lumot berdi. Talabalar esa o‘zlarini qiziqtirgan savollar, taklif va muammolarini aytib, ularga birinchi qolda yechim topish bo‘yicha mas’ullarga topshiriqlar berildi.

Deputatlar Urgutda barpo etilgan yangi vokzal faoliyati bilan ham tanishdilar. Samarqand–Urgut yo‘nalishi bo‘ylab yo‘lga qo‘yilgan poyezd qatnovi aholi uchun tez, qulay transport xizmati yaratib, tumanda ishlab chiqarilgan mahsulotlarni yuk poyezdlari orqali yetkazib berish imkoniyatlarini ancha kengaytirishi kutilmoqda.
Loyiha doirasida ikki ta zamonaviy vokzal, ikkita yuk stansiyasi, bir qator infratuzilma inshootlari barpo etilgani, kelgusida temir yo‘lni elektrlashtirish rejalashtirilgani ta’kidlandi.

Parlament vakillari Urgut tumanidagi “Ferre Group” maishiy texnika ishlab chiqarish korxonasida ham bo‘lib, ishlab chiqarish jarayoni bilan yaqindan tanishdilar. Erkin iqtisodiy zonada joylashgan ushbu majmua mintaqa sanoatida muhim o‘rin egallab, muzlatkich, gaz plita, changyutkich, temir eshiklar va boshqa turdagi maishiy texnika mahsulotlarini ishlab chiqarmoqda.
Korxonaning yillik quvvati 250 ming donani tashkil etib, mahsulotlar “Dorsa”, “Kleo”, “Ferre” brendlari ostida Markaziy Osiyo va Ozarbayjonga eksport qilinmoqda. 30 million dollarlik loyiha doirasida mingga yaqin ish o‘rni yaratilgan. Deputatlar eksportbop mahsulotlar turini kengaytirish va yangi ish o‘rinlari tashkil etish haqida takliflarni bildirdi.

Tadbirlar yakunlanib, Urgutda amalga oshirilayotgan islohotlar — yoshlarni qo‘llab-quvvatlash, infratuzilmani rivojlantirish va sanoat salohiyatini oshirish — bir-biri bilan uzviy bog‘liq ekani qayd etildi. Bunday uchrashuv va tashriflar xalq manfaatlari yo‘lida samarali muloqot, tezkor yechim va ochiqlik tamoyillarini mustahkamlaydi.

Aslida, Urgutdagi bu jarayonlar hududning yangi bosqichga ko‘tarilayotganini, imkoniyatlar kengayayotganini va yoshlar, tadbirkorlar hamda aholi uchun yanada qulay muhit yaratilayotganini ko‘rsatadi.