Жиззах шаҳрида «Маҳалланинг ишбилармон аёли» лойиҳасининг шаҳар босқичи ўтказилди. Унда тадбиркор хотин-қизлар ўз маҳсулотлари ва амалга ошираётган лойиҳаларини намойиш этиб, ўз тажрибаси билан ўртоқлашдилар.

Танлов якунига кўра, биринчи ўринни «Заргарлик» маҳалласи вакили, 20 йиллик тажрибага эга тадбиркор Назира Муҳиддинова эгаллади. У 2011 йилда ташкил этган «JIZZAX BEST SCHOOL» бугун 6 та таълим муассасасини бирлаштирган йирик хусусий кластерга айланган. Энг муҳими, тадбиркорлик фаолияти натижасида 200 та доимий иш ўрни яратилган.

Жумладан, 350 нафар болани қамраб олган боғчанинг 2 та филиали, 3 та ўқув маркази ва инглиз тилига ихтисослаштирилган хусусий мактаб фаолият юритмоқда.

«Маҳалланинг ишбилармон аёли» каби танловлар хотин-қизларни тадбиркорликка рағбатлантириш, уларнинг тажрибасини оммалаштириш ва янги ташаббусларини қўллаб-қувватлашга хизмат қилади.

Назира Муҳиддинованинг натижаси эса аёл тадбиркорлиги нафақат оила фаровонлиги, балки янги иш ўринлари ва ҳудуд иқтисодиёти учун ҳам муҳим эканини кўрсатмоқда.