“Маржона текстил” раҳбари ўз тажрибасини хонқалик аёллар билан бўлишди
O‘zLiDePнинг “Халқ билан бирга” умуммиллий дастури доирасида Хоразм вилояти Хонқа туманида хотин-қизларни тадбиркорликка кенг жалб этиш, уларнинг бизнес соҳасидаги билим ва кўникмаларини ошириш ҳамда илғор тадбиркор аёллар тажрибасини оммалаштиришга қаратилган “Бугуннинг тадбиркор аёли” лойиҳаси доирасида тадбир ўтказилди.
Унда “Ишбилармон аёл – 2026” кўрик-танловининг ҳудудий-Республика босқичида учинчи ўринни қўлга киритган “Маржона текстил” МЧЖ қўшма корхонаси раҳбари Дилафрўз Бекчанованинг тадбиркорлик фаолияти ўрганилди.
Таъкидлаш керак, 2 йил аввал ташкил этилган корхона бугунги кунда болалар кийим-кечаклари ишлаб чиқаришга ихтисослашган бўлиб, замонавий ишлаб чиқариш қувватлари асосида кунига 2 минг дона маҳсулот тайёрламоқда. Корхона маҳсулотларига ички бозор билан бир қаторда хорижда ҳам талаб юқори бўлиб, айни пайтда Туркия, Россия ва МДҲ бозорларига экспорт амалга оширилмоқда. Жорий йилнинг ўзида Россияга 1 миллиард сўмлик болалар кийим-кечаклари экспорт қилинган. Корхонада 50 нафардан ортиқ хотин-қиз доимий иш билан таъминланган бўлиб, уларнинг 20 фоизини ногиронлиги бўлган аёллар ташкил этади.
Тадбир давомида “Маржона текстил” корхонаси раҳбари ишлаб чиқаришни йўлга қўйиш, янги бозорларни ўзлаштириш, экспорт салоҳиятини ошириш ва хотин-қизлар бандлигини таъминлаш борасидаги тажрибалари билан бўлишди. Партиянинг мазкур лойиҳаси хотин-қизларни бизнесга кенг жалб этиш ҳамда ўз соҳасида юқори натижаларга эришаётган илғор тадбиркор аёллар тажрибасини оммалаштиришга хизмат қилаётгани қайд этилди.
